تبي السبب ؟!

لـ ، ، في غير مُحدد

المنسابة: حوار حول مصداقية الشعراء انتهى بهذه القصيده

شاعر فِكرْ مانيب شاعر خرافه
والعالم الله تسبق أقوالي أفعال
يوم الردي عَزّه مقاله وقافه
أنا يميني قاضبه كل فنجال
شَربتْ { كيف} الوقت بعد الضيافه
وشربت { سيف } الِطيبْ يا طيّب الفال
وأخذتْ من ماضي الجدود الصلافه
وعز القرايب من ولد عمٍ وخال
وعز الخويّ اللي ب/ جوفه نظافه
حرٍ مضاريبه عطيبات وجلال
والشعر قرمٍ لا حضرت بزفافه
{ صاحب } وله عندي جديدات وسمال
أعطيه ( هميّ ) لا هلكني جفافه
وارد معه عدٍ مواريده زلال
واركي ثقيلاتي وأنا أحمل خفافه
ويحمل خفافي وأركي المتن ل/ثقال
ما قلت : ماقلته عشان الصحافه
وإلا لأجل ينقال ذا قول من قال
ذا ترجمان اللي من الضيم لافه
ما لو يلوف احدٍ عن الحق قد مال
والشعر لو وصلْ السمو بإحترافه
ما يطمّن رجالٍ ولا يرفع رجال
منطق وأدب متسلسلٍ من ثقافه
فيها الرقي باقي على مر الأجيال
من قبل عصر الجهل حتى الخلافه
ومن الخلافه زال غيره ولا زال
موروث امّه مايبي له عرافه
من قبل اهل العلم يحفظه جهّال
خل الخلاف ودوك ماهو خلافه
شيٍ بجوف الصدر شدّاد نزّال
منّه معاليقي تعالى اهتافه
والقلب نبضه بوحة السين والدال
تبي السبب ..؟ سيد الغنج واللطافه
اللي غدى بقلبي من الجال للجال
الناعم ..المترف.. سليل النيافه
اللي يجر الغي لا جاك يختال
هيبه.., وطله , ولا عرض بإلتفافه
يازين طاروقٍ على اللال واللال
كنه جموحٍ كايده بالعسافه
وماكل من يركب على الخيل خيال
وان جيت انا بوصفه دون الكلافه
كل الوصوف النادره عنده هزال
وين انت ياهجس التميمي وقافه؟!
محتاج لك بالحال.. بالحال بالحال
قلبي تزايد دقته من شعافه
لا هملجت عيني ولا ارتاح لي بال
ودي اقول.. ولا حقتني مخافه!!
مااوفيه حقه يلحقه مني اغفال
ظبي النفود اللي ظلاله يخافه
مورد الخدين ابو خصر ميال
ابو رموشٍ تكتسي بالعنافه
تشبه سيوفٍ جردت حزة قتال
جمره وثلجٍ عانقه بالتفافه
واعزتي للي يخايل ولا طال
البيض عنده مايجون الوصافه
والحسن مثله لاحشى ماحدن نال
والحب من شانه مشيت بضفافه
جيته وصدقي صاحبي اول وتال
كني {هشام}* وهو غدالي {رصافه}*
ياطيب خد الدار في كل الاحوال
قد قيل لي جلفٍ وبالعند آفه
وصلفٍ على طبعي من اول ولا زال
اشرب فناجيل القروم بلهافه
واصمد ولا اهتز لو صار زلزال
واليوم انا عزاه حالي كسافه
ضاعت علومي عقب ابو عود فتّال
فنجال ابن رقراق طاب ارتشافه
من شفتينٍ كنها الجمر شعّال

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين