لاتظن اني غرير (ن) حتى لو قلبي سموح. لـ عبدالرحمن غانم الدوسري

لاتظن اني غرير (ن) حتى لو قلبي سموح - عبدالرحمن غانم الدوسري

ما بنيت ابقلبي الا صرح ساسه من جروح
وان هدمته فانت راعي العرف ياهاوي الجراح

دوك جمر الحزن فوقه دلة الفرقا تفوح
صب لي فنجال منها وبهِّره صبر وكفاح

ايه بصبر دام حبك ليل ما شابه وضوح
يمكن الفرقا ارحم بحالي من اطعون الرماح

طعنة الغدرا محال تكون من باب المزوح
واستباحاتك تعدت حد اساطير المزاح

لاتظن اني غرير (ن) حتى لو قلبي سموح
طعنة المقفي جريمة مالها خانة سماح

كم دمحتك يالخطايا في سبيل ارضي الطموح
وللأسف مازادك الا غطرسات أم الذحاح

ماهقيتك غازي (ن) قلبي لجل هدم الصروح
كنت اظنك تستحل بحسب موروث الصحاح

كنت اظنك جيت مضماد (ن) لقلبي والجروح
واكتشفت انك هواوي غدر ياهاوي الجراح

كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
التعليقات المنشورة غير متابعة من قبل الإدارة. للتواصل معنا اضغط هنا.