ياطير أنا بشكي لك الحال - مشاري البابطين

ياطير انا بشكي لك الحال ياطير
من بعد ربّي مالغيرك شكاوي

إنت الوحيد اللي مكانك عن الغير
يبقى غلاك بداخل القلب حاوي

ياما تخاوينا على العزّ والخير
إمّا على مقناص وإلاّ دعاوي

في ديرة(ن) فيها الفياض المزاهير
تشفي غليل اللي حياته شقاوي

ياطير وإن قلّت عليك المشاوير
والقيض سوّى في جسدَك البلاوي

لابد ماتاتي علينا التباشير
وسهيل ينور في سما كل هاوي

وتلاعب الملواح وتصيد وتغير
وتداعب بهدّتك قلب الهواوي

ياطير بإذن الله تزين المقادير
ويصفي جناحك عقب ماهوب ذاوي

جيت أشتكي لك مادريت إنّي بخير
إلين شفتك يابعيد الهقاوي

عرفت وش فيني وعيّنت تبرير
يومه لوى قلبي من الضيق لاوي

الله على الربطه يعين الصقاقير
قد قالها ابن فطيس حيثه نداوي

واليوم انا مثله ومن دون تفكير
أعيدها بعده على كل راوي

الله يعين القلب في ربطة الطير
والله يحقق لي جميع المناوي

© 2022 - موقع الشعر