وجه المرايه ..!

ناظرت وجهي وسط وجه المرايه
شفت التعب واضح عليّه وباين

ملامحي متغيّره من شقايه
ما غير اناظر فالمرايه واعاين

يارحمة الله .. ماجرالي كفايه
الجسم عظم وجلد .. والوجه شاين

من يستمع واحكيله اتعس حكايه
واشكي عليه مسببين الضغاين

انا هواوي من بداية صبايه
يوم الزمان بخير والحظ زاين

كنت استلذ الحب فأول بدايه
جاهل .. واحسبن المحبه هواين

لين انجرحت وعفت قصة هوايه
قصة وفيّ ٍ طاح في حب خاين

درب المفارق كيف صار النهايه
كيف افترقنا بعد كنا خداين

الله يجبرني ويجبر عزايه
مابيني وبين السعاده مداين

سيطر عليّ الياس واخلف رجايه
بانت بوجهي للتعاسه بواين

يالله عسى مسك الختام الهدايه
ليا ارتحلت بيوم فرقا الضعاين