مي ..!

يقولون ابتعد واترك هواها
وأنا قلبي تقطع من غلاها

وانا وشلون ابتركها وابرحل
وقلبي مابعد يوم ٍ نساها

تمّكن حبها من وسط قلبي
وعمري ضاع وانا اطرد وراها

أغار إمن الظلال إليا تبعها
وأغار من اهلها ومن اقرباها

أنا المجنون يا مجنون ليلى
أقبّل دارها وأعشق ثراها

وربعي حججّوني علّي أسلى
وأتوب إمن الهوى وأنسى هواها

لكنّ الشوق زاورني بمكّه
وحجاج الحرم تكثر دعاها

دعيت الله يجعلها نصيبي
وتنسى بالفرح ماضي شقاها

هنوف ٍ بالمحبه ضيعتني
وباق العمر عشته في رجاها

عرضلي دونها سبعين جادل
وأنا مابي من الدنيا سواها

لو أشكي مالقيت إمن المحبّه
على الانهار ينضب حلو ماها

ولوّ أشكي على نجوم الثريّا
هوت فالأرض من عالي سماها

ولوّ أشكي على هضبة طميّه
ثلاث شهور ماتقطع بكاها

ولو تدري بحالي ميّ صاحت
ولكنّ أهلها خبّو علاها

تحسب إني سليت وطاب جرحي
وأنا اشقتني جروحي من عناها

نهوها عن هوايه وأجبروها
وأنا اللي حامي بسيفي حماها

والا ياليت جرح ٍ في حشايه
بعون الله يصبح في حشاها

ونصبح كلنّا مرضى محبّه
وتصبح شوفتي غاية مناها

وألا يا ميّ مدري وش علامك
ورى رحمتك طويتّي رشاها

تركتيني وطعتي كل عاذل
وعذال الهوى شين ٍ حكاها

وحالي يعجز التعبير عنها
سقيم الروح وأدوّر دواها

يا ميّ الله يثيبك عالجيني
ترى روحي مرضها من وفاها

ولا ظنيت أبسلى عن غرامك
ما دام الله روحي ماخذاها

ولا من متّ فأمشي فوق قبري
لعلّ الروح يرضيها قضاها