والله ما اسلا عن غرامك وانا حي ..! - محمد حمود العضياني

والله ما أسلا عن غرامك وأنا حيّ
والظاهر ابعثبه نهار القيامه

يوم ٍ به العذال ما تلتفت فيّ
واقابلك فالحشر يأم اللثامه

وأعلمك كم جرح من غيبتك نيّ
وأخبرك عن حال ٍ تطاول سقامه

طوتني الغربه بعد غيبتك طيّ
والكون فيني ضاق يامه وشامه

جمرة غيابك كاويه مهجتي كي ّ
وجسمي هزيل ومابقى الا عظامه

غيابك أوجعني ومافي يدي شيّ
أسهر وأحسد المهتني في منامه

والقلب مثل الورد يذبل بلا ريّ
تماكني قلبي لا يذبل غرامه

ياميّ يفداك الذي حاشت يديّ
ردّي علي الفَرْح والابتسامه

وأنا أدري إن ظروفنا وضعها سيّ
وأنا ادري بقلبك وصادق هيامه

وتدرين بإني قرم .. ماني ولد عيّ
يموت عمري ماتموت الكرامه

نحبّ حب ّ شعور مانعشق الغيّ
ولا قط مشينا في دروب الندامه

والله ما اسلا عن محبتك ياميّ
ما دمت حيّ وفوق راسي عمامه

وإن متّ قبري احفروه اوسط الحيّ
أبيه قربك لو لحقني ملامه

© 2024 - موقع الشعر