من روايات المرايه - فهد معتوق

المرايه .. و شمعتي .. و علبة دخَان
و ذكريات الأمس .. و الحب القتيل

و قهوتي المسكونه هيل و زعفران
وعطر ٍ مخلّط بقى منه قليل !

كنت ياما كنت و محد ٍ مثلي كان
كنت ياما كنت .. من وقت ٍ طويل

الشعر ينطقني بْليا لسان
دون صوتي تسمع لشعري صهيل !

امتطي صهوة قصيدي بكل امان
و اسرح بوادي العمر بين النخيل

ما اخاف الليل .. دام الفرح بان
و ما احاتي الكبوه .. دام الحظ زميل

و الظما ما يجري بنهر الحنان
و الشقا ما عنده لدروبي دليل

و البكا .. وش هو البكا ؟ ... ماله مكان
في وسط عيني .. البكا بس للذليل

لين حطتني ( الدنيّه ) ف امتحان
بامر ربي .. و بت من همي عليل

و صرت انا لغدر الزمن شاهد عيان
شفت ياما شفت ياما شفت ويل

العزيز بعين من عزّوه هان
و صاحب الأفضال نكروا له الجميل

و الحقيقه مْن الكذب جاها احتقان !
و القزم اصبح على سيده طويل !

و الشعر حتى الشعر معناه شان
أصبح مْغلّف .. تعال ادفع .. و شيل !

شفت شخص ٍ في المرايه كان و كان !
و ليت من ما كان يرجع بس قليل

الشبه بيني و بينه من زمان !
بس دوام الحال .. رابع مستحيل

العطر ما عاد به نفحة حنان
و دلة القهوه بلا قهوه وهيل

و المرايه غطى واقعها الدخَان !
و ما بقى من شمعته .. غير الفتيل !

© 2024 - موقع الشعر