الله يسامح

الله يسامح يارفيقي من يلحقك الملام
والله يحاسب من رمى واركز بقلبك خنجره

والله يجازي اللي بعد شكواك مالقاك اهتمام
بعض القلوب عن المحبه والغرام مشفره

ان جيت تشكيله من اتباع المحبه والهيام
زود بك الكية وبيح كل صبرن تذخره

تهيم به حتى النخاع وكنك الد الخصام
تنثر عليه الدمع ماحنك لو انك تمطره

ماكن بين اضلوعهم قلبن يحن المستهام
وقلوبهم ماكنها الا بالقسا مستعمره

الهجر دستور لهم والوصل خارج عالنظام
ولايفيد بهم نصوح ولا كلام التبصره

ماينفعك غير الصبر مامعك مالشكوى غنام
والماضي المشؤوم لاهل العشق لو تتذكره

ترى الهوا قبلك قتل واجد من الناس العظام
قيس وجميل وبن ربيعة وايضا اذكر عنتره

مافادهم في عهدهم حبن مع سلة حسام
تحسب بيجذب حبهم دمعن وليلن نسهره

لك الجفا جبرن وسهر الليل والعالم نيام
ولهم قرير العين وافراحن ماهي بمكدره

ياصاحبي منه الرضا اصبح هدف صعب المرام
ماتملكه لو عرش قيصر تسلبه من قيصره

والعفو منهم والوصل في سلمهم امرن حرام
والخافق اللي هام في حبه لزومن يحقره

شعارهم عذب ولايهنا عشيقك بالمنام
واهجر وذل ولا فنى فالعفو عند المقبره