انا الذي حمله بحر وارتكاله !! - هزاع الشيباني

مانيب من يشكي همومه على النَاس
انا الذي حمله بحر وارتكاله

اصارع الضَيقة على حبس الآنفاس
في جاشي اللي محتمل ماجراله

و آجاهد الدَنيا على كل مرواس
صبري على سود الليالي رسالة

والموت كل الموت في موت الاحساس
لا مات حس الرجل ياوش بقاله ؟!!

ما عاد يشعر لو تجرَح بالآمواس
يحسب على ربعه نقيصة وعالة

والرَيشة اللي حبرها فوق قرطاس
اما تخط الهزل وَلا الجزالة

اهموم وجروح وهواجيس وعماس !!
سوَت لها داخل كياني وكالة

لكن دام القلب مافيه وسواس
ترا الدعاوي كلبوها سهالة

مهما عبس في وجهي الوقت لاباس
قلبي كبير .. وهمَ الآيام شاله

وإليا لقا ان الوضع فوضى ومحتاس
عن موطن الشبهات يبعد مجاله

واللي يخاف الله على كل ما داس
ويمناه تبذل دون تعلم شماله

عقب السموم ايهبَ بارد ونسناس
ينسيه لفح القيض ويطيب فاله

قلته وغاية مقصدي بين الآقواس
خصيَت من يغلب حرامه حلاله

الجاهل المغرور مقروع الآجراس
اللي تشوف المهزلة من خلاله !!

فضيخ قلب وصنَف النَاس لجناس
والمنطلق : طيب الفتى من رياله !!

الفرق فرق الَدين يا شارب الكاس !!
يا للي تصنَف كل واحد بماله

ماهوب منطق لو غدا المال مقياس
يمكن تذوب الملعقة فالبيالة

وَلا تشوف القدر من دون ملاَس
ويبقى العشا فالقدر محد(ن) فضاله !!

ويصير ذيل اشعيل عالي على الراس
ويرم الحمل .. ما كنَه اللي ركاله !!

ويطلع لنا فالوقت سالم وجسَاس
اصحاب تربطهم عهود وزمالة

ولازم تطيح الطايرة يابن فرناس
اما جنوب الدَار // وَلا شماله

يا جيفة الجَلاس في كل مجلاس
يا نكبة السامع ومنهو حكاله

البعد عن مثلك غنيمة ونوماس
يا ريش طيرٍ مقتله من ظلاله

رافع مقامي عن مخاواة الآدناس
من منطلق طيب الفتى راس ماله

والقلب ساس العلم و العرق جسَاس
والنَفس لوَامة على كل حالة

هذا الصحيح اللي بنيته على ساس
مثل الحجاز ومثل شامخ جباله

ومهما حصل صابر على حبس الآنفاس
والجرَح ابلقى في زماني دواله

© 2024 - موقع الشعر