صب الوريد

كل القصايد حبرها من وريدي
وكل الشعور ابيك واغليك واهواك

جيتك وقبل آجيك جالك قصيدي
وقبل القصيد القلب ياسيدي جاك

احرفن المعنى..واعسف العنيدي
وادوزن الكلمه على الطرق لرضاك

قصايدي تقدم..وحبك جديدي
بالله وش طعم القصايد.. بلياك

والحب ماهو..تو..فيني وليدي
عمري نزفته وازهر العمر يفداك

وقربك مناي..وضحكتك بس عيدي
ياضحكة سنيني..عسى الله ياقاك

كل القصايد..صبها لك..وريدي
صب الوريد..ورود..لتراب ماطاك