النور في عيني اوحيه

كلّ الغلا لك يا هوى طيفك اغليه
تستاهله حتى الغلا نفسه اغلاك

معذورقلبي لوفرح بأني اهديه
تبي الحقيقة قلبي اللي هواهداك

حي المسا اللي نور بدْرك يضوّيه
عسى الحيا دايم على جوّ اضواك

لاجل النفل يزهى بشوفك ويزهيه
ولا ّانت ربي كمّلك حسن وازهاك

حسين دلّ والحلا فيك مرْويه
قصدي الدلال اللي ارتوى منك وارواك

تفداك روحي والبقا لروحك افديه
من غيرك افدي كلّي وروحي افداك

من غيرك ارجي يا فخر حبّ ابغيه
قلبي تشرف من عرف إني ابغاك

ياسِعْد من حبيته ومن تهاويه
هنيّ قلبن يعشقك دوم يهواك

سعيد من شافك وزولك يلاقيه
يا حظ عين ٍ تسعد بيوم لقياك

وخا طري ينسر لجل اسمك اطريه
في خاطري ناجيتنا اسمك وطرياك

وانشد قصيدي فيك حب ّ واغنيه
تطرب لك بحوري و يابحر مغناك

بنيت لك في القلب مسكن مسوّيه
تعال واسكن ماحدن غير يسواك

آمر واتمّم امْرك اليوم راضيه
شعار قلبي بالرضا لامن ارضاك

يا ما انتظرت بجيّتك حبي ارويه
لك عقب ما ني في الحلم آتراواك

الحين هاش النور في عيني اوحيه
ملاك من طلّتك ما غيري اوحاك

أمطر بغيثك نا ظري وانت لا فيه
واغسل دموع القلب يا زين ملفاك

خل الفرح يفرح بنورك ويد فيه
شعاع نور الشمس يانور مدفاك

يا مرحبا مليار وانّك تحيّيه
هلا بغلا واقلط وحيّاك حيّاك

أقولها بالجهر وما نيب مخفيه
أموت في حبك ولا هوب يخفاك

وابعتذر منك الخطا يومن اخطيه
من غير قصدي به وانا فدوة خطاك