كـم وكـم وكـم وكــم وكــم كـمـاك - عبدالرحمن غانم الدوسري

يا عذاب القلب عافك وسلاك
أحسب اني مااقدر اقواه وقويت

صورك لي الخيال انك ملاك
لين قلت كلمةٍ عنها سميت

إسمك اللي رافعك عن مستواك
لا يغرك بعت مثله واشتريت

هقوتي اني قد تماديت ابغلاك
وغلطتي صدَّقت بانك لي وفيت

كم سهرت الليل في حروة لقاك
كم تراوى لي خيال انك لفيت

كم شربت المر في كاسة جفاك
كم جرحت و كم طعنت ماشكيت

كم بظنك قد دمحت لك خطاك
كم عطيت ومابخلت ولا خذيت

كم نظمت بك قصيد من غلاك
وكم كتبت وكم حرقت وكم قريت

كم وكم وكم وكم وكم كماك
لو أعد إلى الأخير مانتهيت

مشكله إحترت فيك وش بلاك
مبدأك إحترت فيه وش بغيت

دامك تخالف وتخلف مبتداك
وش أبي بك حتى لو إنك رضيت

رح عسى دربك سهال ومايخفاك
إنك انت اللي ابديتها وجفيت

© 2024 - موقع الشعر