درست علم النفس حتى تعرفت - ضيف الله بن سويلم العتيبي

ياحي ياقيوم من هيبتك خفت
قلبي وجل وقلوب الاجواد وجله

يمكن معا نفسي تماديت واسرفت
ومن لا قنط من رحمة الله فرج له

خطيت خطوة مع بعض ناس وانكفت
وصرت اعرف الدجال من كثر دجله

الوقت دار وشفت فالوقت ماشفت
شفت اختلاف ودورة الوقت عجله

ياماخدمت (عبيد) باخلاص وانصفت
مانيب عبد ٍ له ولانيب نجله

وياما على شانه سعيت وتكلفت
وزعلت لي ناس ٍ عزيزة من اجله

وندمت من خدمة (عبيد) وتحسفت
لانه يبا بعض العرب تحت رجله

درست علم النفس حتى تعرفت
وحللت هرج (عبيد) واللي هرج له

مع العفون اهل الردى ماتحالفت
عفن السجايا سلمنا ما درج له

وابعدت عن بعض الرجال وتطرفت
بعد الجدي وسهيل عن نهر دجله

بعد اتضح لي ماتضح لي توقفت
ولاعاد اجي (لعبيد) لو قالوا اجله

انا كذا قلبي جزوع ليا عفت
وكل محاسب بعد ماينتهى اجله

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر