الشعر فن و من هل الفن قالـــــــوه - ضيف الله بن سويلم العتيبي

الشعر فن و من هل الفن قالوه
ومن راد يحصيهم تبهذل تبهذال

إن جيت أصوغ القاف كم ناس صاغوه
ولو أذكر الأسماء ذكرت ابن هذال

والا ذكرنا دايم السيف وأخوه
والاّ السديري والزلامي و بذال

ابا أتحدى القاف ممن تحدوه
وسخّرت شطر القاف الآخر على ذال

يا عاذلين القلب خلوه خلوه
قلب العنا ما يستمع قو ل عذال

ما يسمع العذال من غير مزلوه
ويرتاح لإن عدا طويلات الاقذال

في مرقبٍ رؤوس الرياجيل زاروه
ومخصوص للابطال من دون الانذال

المرقب اللي بعض الاشكال ما جوه
اللي على شذب القفا يهذل إهذال

الكذب والبهتان ودَوه ردَوه
وهذي صفه موجودةٍ عند الأرذال

يحكي بناسٍ بالمراجل تعدوه
وعن فعلهم قاصر وقف وقفة الذال

ما ينقص الطيب حكي كل معتوه
ولا تذرب الصفوه مناقيد الأوذال

يا سايقين الكيف مروا وعدوه
وخلوه يشعر بالمهونه والاخذال

وعلى هل المعروف والجود مدوه
أهل الثناء وأهل الشجاعه والإبذال

© 2022 - موقع الشعر