باب الفراق

باب الفراق ليا انفتح بين الاحباب
يدخل معه تسعه وتسعين عله

ويفتح وراه ابواب تجريح واعتاب
جروح منها القلب يبطي بغله

تعجزتداويها تكاترت الاطباب
تكسر مجاديفك وحالك تسله

وعينك يجيها عن هنى النوم حراب
ونارالهجر في وسط قلبك تمله

وتهبك الارياح مع كل الابواب
كن الحزن والهم قلبك محله

تجلس مع اقرابك وكنك مع اغراب
وليا عذلوك تقول ياناس لله

العين ماتجمل بلاجفن واهداب
والنفس مايهنالها الي تمله

وتمشي وقلبك من عنا الوقت منصاب
حتى الطريق الي معه ماتدله

يسريبك الهاجوس من كان الاساب
وتستعرض الي فات لك معه كله

ولاتنتبه غير ازرق الدمع سكاب
من زود همك قمت دمعك تهله

وتقول ياليت القدر كان ماجاب
وقت المفارق بين خل وخله

وياليت مافي الحب تفريق الاحباب
والاياليت اليوم قد راح حله

اهل المحبه في الهوى دايم اتعاب
مجنون ليلى قبلنا الدمع هله

اسأل مجرب جرحه اليوم ماطاب
مافيه شي في الهوى ماحصله

اوراق عمره كلها جرح وغياب
وسنين عمره في الهوى ماصفله