تصد وقت العز كاشف معاداك

تصد وقت العز كاشف معاداك
وبضيم هالزمن تجي وتلتفت لي!

والله لو يدري الزمن بي وسواياك
ان كان هالدنيا قعدت ووقفت لي

لا تحسب اني مثل خبرك برجواك
أضيع لعينك قلوب اهتفت لي

حبيتك من أوّل تولعت وابغاك
وقطعت وصلك يوم نفسك جفت لي

لا طاح من هالعين رجال شرواك
ما ترجّعه هالناس لو اعطفت لي

حبك مثل روحٍ نزعها مجافاك
ما هو بغزل ونقض وآعيد فتلي

يوم أنت تروى من حناني وأنا أظماك
يدينك بوسط النهر ما اغرفت لي

شربت أنا العلقم وكاسه بيمناك
دنياي ما يوم معك قد صفت لي

حاولت أنا اجاري حياتي بدنياك
لكن نفسك ما افهمت واعرفت لي

خلك على عزك بعيدٍ رح هناك
ولا رحت لا تهتف ولا تلتفت لي!