تركض أناملي لعينك على الخاص

تركض أناملي لعينك على الخاص
ومن الوله ترسم لك أصدق أشواقي

ما كني الا طير بيدين قناص
لاشفتك اونلاين تزين الاخلاقي

في وسط بحرك هاويٍ فيه غواص
يا در يا لول ٍ ثمينٍ ٍبالاعماقي

أبدع كلامٍ صافيٍ خالصٍ خاص
لا صرت لك يا غايه الروح مشتاقي

ما هو بمن قوقل روايات قصاص
أصدق شعورٍ نابضٍ فيه خفاقي

ما ني بناقلٍ ولا لاصق وقاص
نسج الخيال مواكبٍ فكرك الراقي

كني على موعد معك ياأغلى الاشخاص
كني معك يا عشق أنا توّ متلاقي

يجذبني شي ممغنطٍ كنّه الماص
يجذبني لشوفك ويلفّ لي أعناقي

واليوم ما لي منك ملجا و مخلاص
الا بربي خالق الكون رزاقي

ولا لي ملاذٍ من سهر ليلي أو مناص
ما غير أبيات الشعر وسط الأوراقي

هاذي مشاعري حبيسة بالاقفاص
اقفاص صدرٍ به كلام الغزل ضاقي

لا الهجر ذنبٍ لك ولا ذنبك اخلاص
لو حدتك ظروف وقتك على افراقي

ذنب الذي حبك على وجه الاخصاص
خصك بحبه والهوى خلفه انساقي

يا طول ليلي دون ما أرسل على الخاص
وين أنت يا صبحي وياحزة اشراقي