حسبة اخواني

من بعد رست مراسيها
ابيوتٍ اثقال تنصاني
ياليت ماكنت قاريها
وياليتها من حدٍ ثاني
دام العذر جاء بتاليها
من حسبته حسبت اخواني
صفحه وانا اليوم طاويها
مضمون قلبي على الساني
عندي ثلاثين مخفيها
محكومة القاف بوزاني
نظمتها دون ملويها
للي... برده تبلاني
لاكن آسف تمحَيها
لوصار ماصار يافلانِي
و الاوله لا تطريها
أخطيت في فهمك الثاني
منته وشرواك راعيها
للي يغنون الالحاني
أصحابنا ما نعاديها
لهم معزه وعرفاني
دام الوفاء من مباديها
والطيب من فعلهم باني
والله ياخوك نغليها
يسمع بها القاصي والداني
تكفي القصيده بمافيها
برضا ولو كنت زعلاني
اهلين لن جيت واثنيها
يامرحبا عد الامزاني
أديارنا الجود كاسيها
والمرجله اشكال والواني
كل القبايل نعم فيها
اخوان واصحاب واعواني