هب النسايم

يا مرحبا بالضيف ترحيب دايم
من حلته يبدي ويلفي محله

فى مقدمه يا طيب هب النسايم
ومن الكرم يلقى سحايب تضله

عند الرجال اللي لهم عز قايم
شموخهم مثل الجبال المطله

صغيرهم وقت اللقاء والزحايم
ما يدخل ابقلبه من القوم ذله

وكبيرهم قوله وفعله حكايم
ابحكمته لو يصعب الأمر حله

واليوم يلحقنا وجوب ولزايم
لجل الرفيق اللي لزوم نجله

ياجعل عينه ماتشوف العسايم
أبو فهد الجود والطيب دله

الحر من فوق المنيفات حايم
كرامته عن كل هزله تقله

من روس لابه مالحقهم هزايم
عدوهم يلقاء العنا والمذله

بني حمود أهل الضفر والعزايم
منهاجهم نهج الرجال الجبلة

مالي على مدح الرياجيل لايم
من وقتهم كسابة المدح كله

الله يديم افراحكم والنعايم
ياللي ملكتو الطيب دقه وجله

ومبروك ياقرم علومه صرايم
من طيّب افعاله تزاحم سجله

يافهيد للعزه شهود وواسايم
ولا يجهلك غير النفوس الجهله

مقداركم واصل لحدة وزايم
القول ثابت والفعايل أدله