منبع الطيب

سلام بأسم الشيخ واسم القبيله
من شاعرٍ لاقال يطرب له البال
جينا نبارك بالبيوت الجزيله
عن شيخنا مسيفر وللخيل خيال
جده معيش وللحمل يرتكي له
والطيب ساسه منبع الجد والخال
وقلنا نشارك والشعر نعتنيله
ساسً لنا ماضي وحاضر وما زال
والشعر والشعار نار وفتيله
والطيب لأهله من على مر الاجيال
حنا هل الطالات واهل الجميله
وحنا هل الناموس في سلم وقتال
امضفري وقت الليال المهيله
يشهد له التاريخ والحق ينقال
يوم ان بعض الناس نفسه ذليله
في ماضي الايام ما جاله افعال
واليوم في وقت الرخاء عزتيله
ماله على فعل الرياجيل مدخال
يقول سوانا وضايع دليله
وبافعال غيره دايم الدوم يختال
من غير قاصر في رموز القبيله
الاسم يجمع له طحاطيح وابطال
والسيف يُعرف من مواري صقيله
ولا كل رجالً يحاليه رجال
وكم واحدن وقت السعه وش حليله
وليا حدتك أظروف حدك على الجال
وكم واحدن فالوقت كفه بخيله
لا سد ميقافه ولا جمّل الحال
وكم واحدن دنفوس فعله فشيله
نمام ومنافق وكذاب محتال
ومثله ضعيفً ما يزبن دخيله
والجار ماله حق في سلم الانذال
ياليت للانذال وسمٍ تشيله
حتى نميزهم على كل الاحوال
وصلاه ربي عد وبل المخيله
على رسول الحق في ختم الامثال