الله من الايام والوضع معكوس
 ياربعنا ياللى تعرفون الامثال 
 دنيا تعلمنا مفاهيم ودروس
 ما تغير الطيب على عكس الانذال 
 والناس فيها بين رئيس ومريوس
 وشلون ساوت بين طيب وبطال 
 والفرق لأهل العرف واضح وملموس
 والطيب رمزالعز في كل الاحوال 
 الطيب لأهل الطيب مكسب وناموس
 يبقي باساميهم على مر الاجيال 
 لاهمهم دنيا ولا كثرة فلوس
 ولاهمهم فالوقت تجميع الاموال 
 لاكن حال الناس فالوقت منكوس
 واليوم قدر الناس بجنيه وريال 
 اللي كثير فلوس لوكان ملحوس
 تسعى له العربان رجلي وخيال 
 لو كان جده هيس وابوه دنفوس
 كلاً يبروز صورته حشمة المال 
 والا قليل المال فالوقت منحوس
 محدٍ يبا ذكره على كل الاحوال 
 لو كان جده شيخ وابوه من روس
 ون جات دورات الزمن جاله افعال 
 كثر الدراهم غيرت ناس ونفوس
 خلت حقير الناس فالوقت رجال

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين