ما يدوم البرد والقيظ يْتسلل للمبيت
والظلام ان طال مهما طال..يمحيه النهار

والجبل أكسر شموخه..كان في راسه بديت
والبحر مهما تباعدنا قراره..له قرار

والزعل مثل الجليد..ان ماقسى فيني..قسيت
لين تستلم جُزيئاته بيد الأنصهار

هي سحابة صيف لا تعمر..ولا بتْهد بيت
نظره / وبسمة / وخطوه..واعتبر ما شي صار

وانت ياللي مزعل ٍ حالك..وللفرقى نويت
لك مقام و إحترام ولك حضور ولك وقار

بس تسترجي تعدى حدك ..ان عنّه سليت
والله اني..لَ اعمر الخارب واخرّب بالعمار

تخطي وتبغى محد يحكي معك..مهما حكيت
من معي.؟ شهبندر التجار والا شهريار

اذكر ان للفعل ردة فعل..لو انك نسيت
ساويه له فَ الحجم..ومْعاكسه له..فَ المسار

لا تظن بْكل مره..تطعن متوني عفيت
إتقي شر الحليم ان مال عن طوره وثار

احتملتك مره واثنتين..يوم بْك َابتليت
قلت صاحب!! والصحيب ان مانفع ماهو..بَ ضار

استحيت ارجي حياءك..وانته ابدا ً مستحيت
ذاقت عيونك حلايه..ولْهمت كل الخَضار

كاني مْغمّض وساكت..مو بمعناه انعميت
شايفك..بس ما بودي..يسبق اللوم الفقَار

لين ضيّقت الوسيعه..وارتمى صبري شتيت
واخرجت يمناك سيفي..طالبٍ رداعتبار

لعنبوك اكبر علامك..ما تقوم الا وكبيت
العرب تكبر وتعلى..وانت تكبر..فَ انحدار

والله اني لو خطيت وبالخطية إبتديت
ما يريحني ضميري..لين اجي لك..بَ اعتذار

لكن اني ما غلطت ولا على طرفك وطيت
ليه اجل أرخص شموخي..واكسي العز انكسار

كان تزعل من سواتك..عنْك والله مادريت
سكّن العين الدموع..ولحّف الوجه اصفرار

أزعل / ارضى..أرضى / ازعل..جعل عمرك ما رضيت
أركب اعلى ما فَ خيلك..واقفل ابواب الحوار

شف وش اللي يعجبك .. حطّم / وكسّر..مشهيت
واحد / اثنينه / ثلاثه / أربعه..أقرب جدار

لو شريت رضاك مره..كل مره ماشريت
وان طلبت الوصل مره..بطلب ابعادك مرار

منهو انته لجل اجيلك..واتبعك لامن مشيت
لا انت ابوي / ولا انت اخوي / ولا انت خل / ولا انت جار

واحدٍ من جيز عالم..لو عطيتك / ماعطيت
واجب المسلم لمسلم..والعطا شيمة كبار

ان قعدت اهلا ً هلابك..وان تلملمت وسريت
فكة ٍ منّك غنيمة .. وبْعدد شر ٍ وطار

رح عسى الله لا يردك..وانقلع من حيث جيت
جعل درب ٍ سار بك للورد .. فوق الشوك سار

وافترض لو افتراض اني على حقك سطيت!!
وش بيدّك غير تلطم..! يدْك ما تعطيك ثار

لو خطيت / ولو خطيت / ولو خطيت / ولو خطيت
فيك؟ يا بخت الخطايا بك..ويا حلو الدمار

لو عديت إلّي بخيرك..يمك بْخيري عديت
وان تصب القااز عينك..تقدح عيوني شرار

وان لعب شيطانك بْراسك..على نفسك جنيت
جاك شيطاني يخمك..من يمين / ومن يسار

بَ اقتدار ارسلك خلف الشمس لو اني بغيت
وان بغيت اعفي..عفيتك..من جنوني بَ اقتدار

لا تصدق قولهم طيّب..وما مثله لقيت
إيه طيّب..لين يلفظ صبري الأنفاس .. نار

وانتبه.! لا فات فوتك..ماتفيدك..ألف ليت
والظلام ان طال مهما..طال..يمحيه النهار


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر