ربعي مطير

ياهاجسي مد النظر.. أبصر الحال
هوّن على صدرن تزايد غليله

الصمت فوق الهم موجع وقتال
يخفي رداهم بالنفوس العليله

صار الحكي برهان عزَّه ومدهال
والا السكوت اليوم حكمه ثقيله

عزاه ياقلبن مع النور رحّال
شغل الظلام أصبح هواية جميله

تمشي على كيف الخطايا وتختال
سودا ضمير وْهالبصاير هبيله

ياهاجسي ماعاد بي حمل ينشال
لو اني أكبر من هروجٍ طويله

الصبر ماهو بيت يحفظ وينقال
صبري طويته وآبدوّر بديله

يبوني أسكت والآكاذيب تنهال !!
ماني ضعيفه لو حروفي قليله

صحيح بنت وعندي أحلام وآمال
بيضا خفوق وبالمواقف أصيله

لكنّ انا مع هالعرب خصّ ما ازال
أقسى وأخطر من سيوفٍ صقيله

أصنع من الكلمه تعابير وأمثال
وآقف بوجه الوقت لو زاد ميله

بنت وأبويه شيخ موبس رجال
ماهو من أهل الهرج فعله دليله

ربعي مطير وقدرهم يازن جبال
يعني أموووت ولا حياتي ذليله !