هاجس الذكرى ..

وقفت بهاجس الذكرى وجيتك والغلا مهجور
تعلمت الوفا باقي على صفحات تطويني

تجرعته مثل طفل ٍ يناظر بالسما عصفور
وليته ينهزم غادي وحظي طاح من عيني

أنا ماني مثل غيري ينام وخاطره مجبور
أنام وحزني يدفعني مع الأيام وسنيني

طلبت من العمر ليله يريح خاطري المكسور
ولكن حظي العاثر يضيع بلهفته فيني

يضيع الهم بأعماقي وصبري ماعليه قصور
تعبت أصبر على حالي وأنا أحزاني تباريني

تعبت الظلم وإحساسي عساه اليوم بس يدور
ويصدق حظي لو مره وبشموعه يضويني

على فكره نسيت أشرحلك إحساس ٍ غدا معسور
معاد أذكر أنا منهو وضاعت بي عناويني

دقيقه ودي أتذكر في ليله كنت أنا مسرور
تصدق حتى أفكاري تقول أرحل يناسيني

تغيب أفكاري في لحظه غياب الهاجس المنثور
ويبقى الحظ يجبرني على هموم ٍ تعزيني

تروح أفكاري ماترجع تسابق مع شعاع النور
على حظي على عيني على صدمات تنهيني

أنا ماني حقود وشين ولكن حظي المغرور
تجاهل طيبة قليبي وفي الآخر لعب فيني