كـثـر الحــزن .. - محمد بن لافي المقاطي

من كثر حزني داخل الصدّر مرّات
حتّى لذيذ النوم فرقاه يطري

وش جابني لدرب الشعر نزف الأبيات
إلا حبيب ٍ مسكنه وسط صدري

ماحدّني لدرب العنا والمضرّات
إلا غياب ٍ حطّم القلب بدري

ماجابني يمّه على كل الأوقات
إلا وجع من دونه النفس تبري

ياصاحبي خذ لك دقايق ولحظات
وإلا تبي تعرف مدى اليوم صبري

مدري أصيح بحّر صوت ٍ وآهات
ومدري ترى ترفع بها طيب قدري

ماجيت أدوّر للمشاريه شرهات
جيتك على وضح النقا وأنت تدري

إهتز بي حالي عليك إنت بالذات
وماضنتي تقنع ويكّفيك عذري

ياتاج راسي مكسبي إسمع الآت
شف لك حلول وعجّل بحل جذري

ماحدّني لشوفك سوى بعض كلمات
إني أبيك ورغبتي بك ياعمري

جيتك على درب العنا والمتاهات
حتى الصبّر في وحدتي ملّ صبري

تبي الصراحه وإختصار العبارات
مافيه غيرك يجبر اليوم كسري

لا طحت من طولي وشفتك نهايات
تعال خذني وحطّني وسط قبري

© 2024 - موقع الشعر