راعي سبلا - فواز فارس الدواي

يالله ياغافر ذنوبٍ كبيره
رحمتك اكبر من ذنوبٍ كبيره

انت الرحيم اللي تجيب الدعاوي
لاصكت جموع العباد الغفيره

عفوك ولطفك ياإله الخلايق
والستر يارب العباد الستيره

انت الرجا ياربنا بكل حزه
عند الامور الهينه والعسيره

ادعيك بسمائك بوقت الصلاتي
بسمائك الحسنى النقيه الشهيره

يالله تهون مابقلبي من ايام
هو مطلبي بين الهموم الكبيره

يوم الثلاثا العصر روادني الهم
خلا دموعي دون ماشعر غزيره

قالولي يافواز مشعل رفيجك
قالب واصاباته تراها خطيره ؟

من ضيقتي اطالع بتيلفوني
واقول عزالله طاحت عشيره

مشعل انا وياه امس انتمشى
نسولف بديره ونضحك بديره

والراجحي مناور معانا مسير
على دواوين الربوع المنيره

رحنا وعزمنا طيبين الجماعه
على احتفالٍ للوجيه السفيره

عقبٍ تركته قال بروح للبيت
والصبح نمشي للمخيم نديره

راح وحصل ماصار باخر طريقه
يالله عساها عند مولاه خيره

بسم القبيله ننوي نسوي الطيب
من شان تبقى للجماعه مسيره

نبغى القبيله كلها افراح بفراح
ارجالها ترفع سيوفٍ شطيره

نأيد الجمعه ونتعب عليها
ومانلتفت حق الوجيه الغبيره

نبغى مجالسنا تراث وثقافه
وتواصل الارحام ينبت عبيره

حنا سعينا والولي فوقنا يشوف
يشوف مسعانا وعينه بصيره

ياما تهمونا قاصرين الهقاوي
لن الحسد يفجر من القلب غيره

نخلي النمام يفتر لسانه
مثل الجمل اليا فدر من هديره

متحيزمينٍ للسعد والمراجل
وسيف المعزه نسحبه) من جفيره

هذي عوايدنا مع الشيخ(مشعل)
وفعولنا لمشعل تراها صغيره

مشعل بن مسيلم ) صدوقٍٍ وطيب
يشير ربعه والربع تستشيره

امير يامشعل وطيبك اماره
انا اشهد ان الجود راسك اميره

مشيت وياك وبخصتك بدقه
تفداك سودان القلوب الحقيره

فيك الكرم بابه مشرع على طول
ياما عطت ايدك نفوسٍ فقيره

تعطى لربك ماتبي يمدحونك
حارص على طيب الخفى والسريره

كم واحدٍ بالخير يذكرك دايم
حطيتلك في منهج الطيب سيره

لاعدت يايومٍ بدار العنايا
جيته ولقيته طايحٍ في سريره

انهار عقلي والحزن صاد قلبي
وسجن الحزن في داخله صرت اسيره

انا اشهد انك غاليٍ حيل عندي
في طيحتك زاد الغلا في هميره

ماجور واجرك عند رب العبادي
اجرٍ قليله يسعدك عن كثيره

لاتحسبني دالهٍ عنك سالي
لا والذي للطير صخر مطيره

انا وبن راشد ترانا نتحدى
منهو يوصل للمحبه الغميره

فهد ولد راشد عريب الجدودي
يشبه لفارس في حروب الجزيره

وابو علي موسى يعزك معزه
لاراح بلحاله دموعه خريره

وفالح ابو يوسف ونعم الرياجيل
محبتك عنده حشى مو صغيره

بين غلاك بداخل قلوب ربعك
كلٍ عيونه سولفت عن ظميره

عزاه يانارٍ جلسنا بطرفها
نضحك ونقصد والنشاما سهيره

دلال صفر مبهراتٍ على النار
وربعٍ يشوق كل منهم نظيره

ضحك وناسه وكلبونا بني عم
بمخيمٍ كبر البلد فيه نيره

والشيخ مايوقف بذبح الذبايح
مخليٍ دم الذبايح ثريره

اذا قعد (باشا) واذا قام (باشا)
يبخص وعينه بالمراجل خبيره

كريم سبلا من سلالت مطنخ
والنعم اخو نوره علومه شهيره

ياراعي العطفه حصان الاصايل
ياجعل راسك سالمٍ في مصيره

ترجع ليالينا اذا الله قسمها
وكلٍ من الفرحه يذكي بعيره

كاني اخو مشعل .. اذا جيت طيب
لتشوف شيٍ يذكرونه ذكيره

ابعث سلامي لك يا طيب الساس
ودموع عيني بالبيوت الاخيره

© 2024 - موقع الشعر