اتحدى الجرح - وسمي العبيان

لاتغرك ضحكتي خافقي منك مغبون
ابتسامه تعكس الحزن وطعون الغرام

اكتم الاحزان والدمع حاير بالجفون
مستحيل الدمع ينزل ولو زاد الهيام

اتحدى الجرح واصبر على جور الطعون
اكتم الحسره ولا جرح شعورك بالكلام

ما شكيت الهم لو بان حزني بالعيون
وماهزمني الشوق لو بان في وجهي ملام

لي متي تقسا على قلب مافكر يخون
لي متي عيني من اسباب جرحك ماتنام

ليه تظلم من تمناك باسباب الظنون
ليه تشعل حرب الاوهام من عقب السلام

ليه تطفي شمعة الحب في قلبن حنون
ليه تطرق باب الاحزان وتفك الخصام

افرد غصون الغلا وانت تقطع لي غصون
واضحك بوجهك ولو كان في جوى عسام

الاراضي ممحله وانت ضحكاتك مزون
ليه ماتروي اعروق الغلا وانت الغمام

منك عقلي ياالغلا واصلن حد الجنون
من سبايب خنجرك خافقي اصبح حطام

© 2024 - موقع الشعر