واقع المحميه

يا هاجسي يا مروض القيفاني
يا مرضي الوجدان والقافيه

يا عزوتي يا نصرتي وعواني
تعال و فزع لي من اللي فيه

متضايق ومن ضيقتي زعلاني
الحال من كثر السهر مبريه

اجر صوتي واسمع الجدراني
لا رد صوتي بالصدى رديه

النوم من كثر الفكر جافاني
اسهر طوال الليل للفجريه

ما نيب انا أشكى فرقة الخلاني
شكواي تشكي واقع المحميه

امه وتشكي عامل النسياني
همن وفقر وحالها منسيه

زاد الدخل لكن للقوماني
اللي خذى زوده واخذ تاليه

يلعبنا التاجر بلا حسباني
ما خاف ربه ما خشى الدوريه

ولامن شكيته قال دور ثاني
يمكن تكون ان شكوتك كيديه

خلك بهرجك يا ولد عقلاني
حنا بخير وغيرنا مبليه

شف وش حصل في معظم البلداني
وحنا نكب الزاد في البريه

أي بالله اني شايف وجعاني
والفرق واضح بين ذيك وذيه

وشوف حال البر والخداني
من الدهور وحالةٍ مقصيه

واهل الحلال وعيشة البدواني
من الغلا كلن ترك ركبيه

أول علينا يرهي الميزاني
واليوم زوده طير الماليه

وبنوكنا تشكي من الميلاني
مهيب من قل الذهب فقريه

ومن خيرنا جانا المعادي عاني
عيد واخذ له مننا عيديه

لكن لا تبحث خفى وجداني
ثم نرمي الغتره مع الطاقيه

خلنا نجر الصوت و الالحاني
وان ريح الأفكار والنفسيه

لحنن وقبلي قاله القحطاني
يومه شكا له شكوةٍ مرثيه

يشكي وينخا قايده سلطاني
من قل ماله يطلب العانيه

يشكي هموم الدين والورعاني
ومن شرة الجيران والطرقيه

خوي ومقرب من كحيلاني
اسمه مع النواب والحاشيه

ماهو من اللي دونه البيباني
تقفل بلا رحمه ولا ما ويه

لكن مدام انه شكا وحداني
شكواي جمع ولا تجي فرديه

دام الشعر رسالة الانساني
رسالتي باسم امةٍ معنيه

أمثل أهموم الشعب بلساني
حلمي ومنه ما غسلت أيديه

لين ان يأخذ ربي الرحماني
أمانته والنفس له مرضيه