الرياض اشبه بجزر البندقيه - سعد الشقحاء

قبل ما نبدى ترى النيه مطيه
والولاء ما جود والطاعه قراري

طايعن ربي على سنة نبيه
والوطن حبه مع الشريان جاري

من هو اللي ناسياً ذيك القضيه
أيتذكر دام للموضوع طاري

واقعن عشناه في يوم ضحويه
سجلته العاصمه حالة طواري

خابرينه والمشاهد فيه حيه
كل شعب المملكه بالوضع داري

بختصار السالفه وقع ألبرديه
والطرق ما ركبوا فيها مجاري

الرياض أشبه بجزر البندقيه
أغرقت كل الشوارع والحواري

السبب غلطه ولا هي حسن نيه
والحرامي دائما بالعفو ضاري

المواطن والبلد صاروا ضحيه
كل شياً صار في داري تجاري

ليه دايم ندمح لفعل الخطيه
ليه يحرم زيد ويدلل مشاري

لا تبرون الذمم ما هي بريه
الفساد أفه على الوضع الاداري

طال صبر الناس والعله خفيه
مشكلتنا ما يعالجها استشاري

أخر الاطباب للموجوع كيه
ان شفاء والا يبي حلن وزاري

الوضع يحتاج له وقفه قويه
تكشف أوراقه ويقرى كل قاري

يا ولاة الامر من كم معذريه
راس مالي دين في جيبن سفاري

راح قدمي منه مفلسةٍ أيديه
غرق في خط الملك تحت الكباري

صحت باعلى الصوت مامن مقدريه
ضاعت الحيله بعد شفت العزاري

مقدر أبدله والحالة زريه
بين قسط الجيب والقسط العقاري

غلطةٍ من تاجراً تحسب عليه
موتري تشليح والتقسيط ساري

مسرحية عاصمة نجد العذيه
الحقوها قبل تذريها الذواري

قبل تلحق كارثة جده النسيه
تنسى في درج قاضينا مشاري

© 2023 - موقع الشعر