الله على اللي كل لبسه جديدي - متروك بن متعب الفراهدي

والله ماريدي كود ضبي الفريدي
وألن باقي الناس ماني بلاماه

الله على اللي كل لبسه جديدي
راع جديل فوق الارداف يسداه

دنوا له الاوضح نهار الشديدي
اشقح سهاوي يفهي الحي ممشاه

اشقح على طق العصى مايكيدي
واليا مشى مازين تضارس حناياه

عينتهم ياطارش من بعيدي
يومن مطراشك على قد منصاه

ان كان ذكروا رحت في يوم عيدي
وان كان ناسيني انا وين ابلقاه

وان كان ماعينت لي نزل سيدي
من عاد ينصح عيني اللي مشقاه

ويذكرهم الطرقي وعلمه وكيدي
بين الرجوم وبين هكران مرباه

وياونتي ونة معيدن رديدي
سواقها عبدٍ على جال منحاه

سواقها عبدٍ بلدّن الجريدي
من حين ردت كل ليل معّناه

وياراكبن حرن بعّديه يزيدي
واخذه مع الدار الوحش بالمواراه

ومّس الحبال وخل شغله جويدي
وقّده عن الضاروب لايرهق يداه

وعجل وعطني منه علم وكيدي
واليا نشد عني قل الموت قد جاه

وان كان رجواني بكلام يفيدي
عطه بداله وانشده عن خفاياه

ابكيه لو يشّره علي البعيدي
ومن لامني قرب من النار مكواه

وان مت حطوني على درب سيدي
أذن قبري داعج العين ياطاه

لامت في دار الحبيب شهيدي
كلاه وقف فوق قبري برجلاه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر