آه مـــــن قلب يعد من الشهوره - متروك بن متعب الفراهدي

آه من قلب يعد من الشهوره
حافظ عّد الشهور اول وثاني

صابر صبّرٍ معديتن حكوره
من فطور العام واليوم رمضاني

لو بغيت اصبر ذبحني حب نوره
صار لي لطف الخواصير امتحاني

جادلن حطت على كبدي حروره
أرحم المجروح ياصف الثماني

عنز ريم عرت الصيد معروره
وأمعجتبه من مكان اليا مكاني

شبه صفرا لبّست في الخيل صوره
واطلقوا عنها مرويت السناني

جردة والطّرش جايتهم سبوره
والبسوها المرشحه هي والعناني

ليت لطف الروح كافيني شروره
ليت انا ماكان لاجيته وجاني

© 2022 - موقع الشعر