يامل قلبن لفـّه الود لفـّا

يامل قلبن لفّه الود لفّا
لفّة غريس ٍ في محاشر حظوبي

أو لف غصن ٍ في طويل المشفا
تقفي وتقبل به ذوار الهبوبي

عليك ياللي شد عنّي وقفا
ياعنك ماشديدهم بالوجوبي

شدّو ودنّو له قعود ٍ معفا
على شناح الصدر وأصله جنوبي

راعي ثمان ٍ يوم يبدن صفّا
مثل البرد من مستهل النصوبي

وراعي مجاديل على المتن ضفّا
يشدن ذيل من الطلايع ذنوبي

يظفي على مثل الصيّان المكفا
تو إنهن زمّن برفع الجيوبي

وكن المحاجر فيهن البرق رفّا
والعين عين موحّشات القضوبي

اليا نهمته قاعد ٍ واستخفا
تحوشه العبره وعينه تذوبي

عهديبهم قدم المسايل اتحفّا
واليوم تلقا كل عد امعروبي