ابوي علمني - ناصر بن برغش السميري

يالله على درب الهدى تهداني
ومن الخطأ ياخالقي تاقاني

انت العظيم اللي عزيزٍ جاهك
رب العباد الواحد المنّاني

البارحه صدري تزايد فوحه
وامسيت اغنّي وابدع القيفاني

ابوي علّني بعلمٍ موجز
فيه الكلام الزين والنصحاني

يقول ابوي وكل عاقل يسمع
جواهرٍ من غالي الاثماني

دوك الحقبقه واستمع ياناصر
واحفظ بقلبك مايقول لساني

ترى الطيور اشكالها معروفه
وامثالها ترى كما الولداني

اول مثلها لن شهر من كفّي
من صيد مخلاب السعد عشاني

وثاني مثلها كل ماهديته
زوّد جروح القلب ماداواني

عساك ياناصر سواة الاول
عساك ما أنت بمثل صنع الثاني

وترى النصائح للرجال مدلّه
ماهيب عيب ولابها حقراني

ابوي في وقتٍ مضى ينصحني
حتّى وانا رجّال ماخلاني

جدّك عسى الجنه تغمد روحه
على دروب المرجله وصّاني

على دروب المرجله والشيمه
حتّى عرفت الدرب انا واخواني

واليوم انا ابا انصك واسمع منّي
مير انتبه يالقرم لاتعصاني

اوصيك في فرض الصلاه الواجب
صل الفرائض واطلب الغفراني

وحافظ على صوم الشهر وقيامه
وادّ الزكاه وباقي الاركاني

واترك عروض الناس لاتأكلها
كثر الذنوب تنقّص الميزاني

وعد الصحيح ولاتدوّر غيره
ولاتستمع في جابة الكذباني

وعليك برضاء والديك ارضاهم
ان كان تبغى رحمة الرحماني

واوصيك فالاقراب لاتهجرهم
لو كان منهم بيّن الهجراني

خلّك على درب الرسول محمد
تبدّل الهجران بالاحساني

وترى النبي وصّى بحسن الجيره
والطيب والمعروف للجيراني

واللي يخالف سنّته ياويله
من فعل يومٍ يخلف الاذهاني

واعرف مواجيب الرجال اعرفها
من خوف لايضحك بك الشمتاني

أوف الرجال حقوقهم بالوافي
وسد النوايب واكرم الضيفاني

واوصيك فالانذال لاتامنهم
اصحى تخاو اللاش والجاباني

ودارك ولو حفّتك لاتنساها
ترى الحرار تعود للاوطاني

وربعك تراهم فالقسى درعٍ لك
درعٍ على الجنبين والامتاني

اقبل ليا شفت الرفيق المقبل
اللي على درب المعزّه باني

وألا المقفي لاتدوّر شوره
خلّه يقفي وانته الكسباني

وليا عرض لك في زمانك غاوي
خطو الغشيم التايه العمياني

ادمح خطاه وقل تراني سامح
خلّك بشانك والا انا في شاني

وان كان عوّد للخطأ والزلّه
اخذ النقا ثم اردع الغلطاني

ترى المناحي مايردد فيها
غير البقر ضرايب الثيراني

هذي نصيحه والنصايح واجد
لو جبتها ماشالها الديواني

قلت الرضاء يابوي تأمرني به
وانا كلام الصدق مايخفاني

ابا اتسّمع للذي تامرني
وابا انتهي عن الّذي تنهاني

ماني كما بعض الشباب التايه
اللي عليهم خيّم الشيطاني

اللي علوم الطيب تقصر عنهم
وجودهم فالمجتمع نقصاني

هذي قصيده والوفاء عملتها
تقصر عن الجهال والخبلاني

قصيدةٍ من خاطري بادعها
ابوي فوق ابياتها عنواني

وصلّوا على طه نذير الامّه
من العذاب وصالي النيراني

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر