الشعر يبكي - ناصر بن برغش السميري

ياربنا تجلى الظلام بنور
بعض العرب على القشر مأمور

شعر النبط شفته بحاله سيّه
يمشي مع الشارع بدون شعور

قلت انت ياشعر النبط وش علمك
قال القهر من هالزمن مقهور

قلت القهر يكفيك ربي شرّه
وانته مكانك عندنا معمور

قال الله يكافيك شرّ الدنيا
صيّورها في كل يوم تدور

انا بلاي من الزمان القاسي
بلاي من شوف الفتى المغرور

بالهذر شوّه سمعتي وأذّاني
يالله عساه لطبقة الحنجور

يقول انا شاعر لو انّه غادي
والوجه ميّت والسوالف عور

للشر صايب والعلا مخطيها
ماشٍ على درب الخطأ والزور

ان شفت زوله قلت ياماش الله
وليا تكلّم كنّه الماطور

وليا حظر له بين قومٍٍ مثله
قالوا تراه الشاعر المشهور

لكن ماينفع معه وامثاله
ياكود من يعطيه بالباكور

لين إيتسنّع ثم يعرف حدوده
ويريّح الشعار والجمهور

الشعر بين الناس ماله هيبه
الشعر يبكي من زمان الجور

الشعر عند اهل الوفاء والحكمه
الشعر عند اهل الوفاء له دور

هذا الكلام اللي طرالي قلته
والمعذره لن كان فيه قصور

© 2024 - موقع الشعر