البث المباشر - ناصر بن برغش السميري

الايافكرتي يانكرتي من تالي الايام
تغيّر نهجها واختلّت الدنيا بما فيها

وفي دار الرساله والامانه ديرة الاسلام
نشوف دشوش للبث المباشر في مبانيها

بلاد الغرب في ديرة نبي الله تحط الغام
تبا تهدم عقول الناس وتحطّم معانيها

تبي تقضي على الدين الحنيف وتنشر الاوهام
وتزرع في بلدنا شغلةٍ ربي يكافيها

والا يامسلمين اصحوا ترى مافيه امانٍ دام
ترى الدنيا تقلّب والقشر دايم يباريها

وترى كثر المعاصي تمحق الخيرات والانعام
ودارٍ بالمعاصي دائمه تكثر بلاويها

وهذيه حقيقه والحقيقه مشيها قدّام
عساها تبلغ المقصود يوم الناس توحيها

© 2024 - موقع الشعر