جابه بجابه - ناصر بن برغش السميري

بديت بذكر من لارب غيره
العظيم اللي يجير من التجابه

قالها اللي ماتريّح من ظميره
دق صندوق الظمير وفك بابه

قول علمٍ ياظميري بالسريره
كان عندك علم هاته مرحبابه

الهموم بحورها جتني مغيره
وارتياح البال مدري وش غدابه

نوب تنهاني ويبدي فيك حيره
ونوب تامرني بلا خوف ومهابه

انت مأمور العنا وألاّ انت اميره
خلّها مابيننا جابه بجابه

والظمير ابدأ مباديه الاخيره
بأختصار وكلمتين أبدأ جوابه

قال انا شبّت بي النار السعيره
شعلةٍ من ناشته ضيّع صوابه

عان جيش الهم غادٍ لي نحيره
بيرقه يأمر عليّه بالحرابه

باح صبري وانتهى واقفى صديره
مير اخذ علمي وحسب لي حسابه

ابتعد عن قرب عميان البصيره
قرب هافين البخت مافيه ثابه

بالمهل سج القدم واعرف مصيره
واخذ حذرك فالطريق اللي مشابه

درب مالك فيه لازم لاتسيره
منهجٍ من غير داعي وش تبابه

اطلب المعبود باللي فيه خيره
خالق الانسان ماضاع الرجاء به

علّ حظك لاتعوقه بالكسيره
وانتبه من ميل وقتك وانقلابه

اعرف المضمون والكلمه نذيره
والزمن لاتظمنه لو إتهقابه

© 2024 - موقع الشعر