يـــا كوكب بلوتو ...!!

يا كوكب (بلوتو) يا غايب عن الشمس
خذني فأرضك لو طقوسك أليمه

شفتك قريب لوحدتي بارد الطقس
أشبه بقلبي يوم حاله عديمه

أدري بعيد ودنيتك ما بها همس
ضايق علي الهم ضيقة عظيمه

ناوي على (نبتونْ) لكّن يدفن (الرمس)
جوه عقيم ومعطياته قديمه

(والمشتري) ميّت ولا يعرف الغرس
لكّن علاقاتي بكونه حميمه

حال الهوى والعشق يا دارس الدرس
حال الهواوي حالةٍ مستديمه

في وحدته لو تضرب الخمس بالخمس
دمعه (خرير) وعلته تستضيمه

ما يطمسه ماضي ولا يعرف الطمس
غازه (كثيف) و(نيزكه) ما يديمه

حزنه قلم والطرس ما يلحقه طرس
يكتب ولو كانت قصيدة عقيمه

همي كتمته داخل الروح (بالدس)
ماهيب يا صاحبي أول جريمه

همي دخل يشكي ولا يبكي (وبس)
حالف ما يرضخ للحياه الرميمه

هجر الغظي عندي (ألم كسرة الضرس)
أو كالغزاة إلي ما صادوا غنيمه

أرجوك ( يا بلوتو ) على حالتي (حِس )
خذني وانا راضي يعيشه كريمه