قريبٍ تنتهي الظلمه

صباح الفجر والقرآن والتجويد والهمَّه
صباح المجد والإسلام والتوحيد أنفاسي

صباح الدين والتحرير والتاريخ يا أمَّه
صباحٍ أقبر أبيات القصيد وتاه إحساسي

صباحٍ أظلم بقلبي وطفلٍ منهمر دمَّه
وشعبٍ آه من حزنه تلاشى وهج نبراسي

غريبٍ تاه ما يدري وش الأسباب والتهمه
لإسلامه لأعلامه لأرضه ولزمن قاسي

وطن ذنبه يبي يبقى شعاع وينهي الظلمه
يقول بعالي أصواته أموت ورافعٍ راسي

جريح الوقت زادت به طعونه واحتوى همَّه
سجينٍ قيده الأعظم مبادي الفخر حرَّاسي

سعى وجه الأمل يزرع بقسوة عالمه كلمه
قريب الفجر لا تحزن ولا يحزنك أجناسي

غدا كلٍ على كيفه يبيع ويشتري الذمه
رفيع النفس ما يرضى بذله جذره ألماسي

فقيرٍ كم سعى عمره لأجل ما يكتمل حلمه
يمر العام بعد العام وهو لأحلامه يواسي

كذا حال العرب أضحى يتيمٍ ما لقى أمَّه
يدوِّر عزته خاضع بذلٍ ماله قياسي

كأن الخزي ذا خاله وقبر المرجله عمَّه
قبيله عار ساكنها على شطَّ الألم راسي

حفيد محمد الطاهر نبي الله للأمَّه
وحامل راية الدعوه غدا بإيد العدوا جاسي

رجولتهم على الشاشه وكلٍ لو نطق فمَّه
يقول الله يصبرهم على الخسران لا باسي

حزين الحرف ينسجهم على صدر الورق ضمَّه
رفعها حاكمٍ طاغي وأشهر منه إفلاسي

أنا حوَّا ولي قلبٍ يبي يحكي لكم كلمه
عساها تحيي قلوبٍ تلاشت في زمن قاسي

قريب الموعد الأعظم قريبٍ تنتهي اظلمه
ويبقى بس نور الله في هالأرض يا ناسي