ضروري تنتهي الرحلة - نبع العطش

ضروري تنتهي الرحلة ضروري تنشف اليدين
ضروري دام مركبنا غرق بكفوفنا العرقا

من العام الحزين أمشي وعلى متني حملت اثنين
هواك وإنت ياخلي وقطعت الدرب من شرقا

وركبت البحر وأمواجه تمايل بي على الصوبين
أجدف مدري لللقيا أو إن الشاطي الفرقا

ومن أول ما بدينا الدرب وإنت مغمض العينين
كفيتك هم هالرحلة مطر والبرد والبرقا

ووصلت بلا مجاديفي و بلا عزم وبلاحرفين
رماني البحر وأشواقي على صخر الندم شرقا

تلفت صاحبي أرجوك وشف خطوات هالرجلين
تعرف اللي مشى لأجلك ومجاديفه طفت غرقا

ضروري اليوم أكملك نهاية حبنا المسكين
وناظر جثته يمكن من أعماق البحر ترقا

تخيل من وصلت الشط تثاوب ظلم وعزم سنين
فغر فاه ولفظ حبك وبلع شهقاته الزرقا

وأنا يا سيدي أزعجتك ولكن الفراااق الحين
بيك تفوق للمشهد خفوقي والهوى إحترقا

وأنا والحب نتوادع يصفق من بعيد البين
ويكتب بآخر الرحلة على الإخلاص إفترقا

© 2024 - موقع الشعر