حبيبي رحل وين - سعد الشولاني

يقول أبو يوسف حبيبي رحل وين
مدري سكن في البر وإلا المدينه

الله من قلب(ن) عشق كامل الزين
وفارقه ياربي إنك تعينه

من بعد ماظلّى بجال المحبين
أصبح بعيد الدار عن نور عينه

يامكبر الفرقى على اللي مودين
دايم على الخلان صعبه وشينه

وأكبر مصيبه حن يكونوا بعيدين
وقلوبهم طول الليالي حزينه

ودموعهم تجري سيولاً من العين
دمعاً يهل والموق عازم يهينه

من شان ناسٍ بالمعاريف ماشين
راحوا وأشوف الديره ماهي بزينه

ياليتني أدري عن حبيبي نزل فين
وأزاوره جوف القصور الزبينه

لو كان جاني العلم والناس مقفين
ماتفرق الأيام بيني وبينه

أبو خدوداً تظهر النور نورين
إذا بداء كن القمر من جبينه

والخشم سلة سيف بارع بحدين
وأشفاء كما ورد(ن) ربى في جنينه

والعين إذا دارت كما عين شاهين
عايش بروحه في مرابيع أمينه

وأبو ثنايا السن يسوى ملايين
تلمع كما لمع السلال السنينه

وأبو جعود(ن) مايله فوق كتفين
مامثلها في الهند كله وصينه

والجسم ناعم دائمٍ عاش في لين
يشبه لعود العاج من زين لينه

قليل ما وصفت غصن الرياحين
لاتعذلون القلب ياعاذلينه

قلبٍ عمد حب المؤدين به دين
الله يلوم إللي بعد لايمينه

يارب تجمع دائمٍ بيننا بين
وتجعل ايميني تخامس يمينه

ياواحدٍ جمّع عباده على الدين
بحق من شرف محمد ودينه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر