جيش كسرى وفرعون - عبدالرحمن بن عمير

لاصرت بايعني وانا فيك مفتون
وش فايدة دنياك من بعد فرقاي

كلي أندفع لك غصب .. وابليس ملعون
بس ! المهم اني عزفتك على الناي

جيتك فرح جيتك ولع جيتك امون
جيتك وانا دنياي ماهي بدنياي

سقت القدم قدمك ولاني بمجنون
لكن في راسي طناخه ياليّلاي

هزمت قبلك جيش كسرى وفرعون
وبعد النصر نلت المعزه بيمناي

وشيدت لك قصرٍ من الدر مكنون
ماطاله اللي يرتجي مدة إيداي

اقسم قسم يامن فتني بهالكون
إني لسوق الدم واجلب لك إعداي

واجمع جماجمهم وتبقى لنا حصون
واقلط على موتي وانا صامل الراي

ماتدري إن القلب عاشق ومفتون
وماتدري ان العشق ليلي ومسراي

تبغى الحقيقه مابقى شي مدفون
تبطي ولا تعرف وش اخر نواياي

جيتك وانا في تالي الوقت مطعون
اليا متى مشتااق لك واتبع اهواي

جبت القوافي فيك والناس يقرون
تسمع صدى صوتي وتطرب على غناي

ليت الهموم ,, هموم عاشق ومرهون
وليت البلا كله من جروحك وجاي

مير البلا لا صارو الناس يدرون
وانا عليك اضرب يميني بيسراي

ترى الجمل لاطاح ميت ومغبون
تكثر سكاكينه وانا اقول لولاي

اغليك لاشفت العواذيل يحكون
عني .. وانا ابديلك هموم شكواي

وان حلّت الفرقى على مايقولون
إن قلت بيباي اقوللك بيباااي

© 2022 - موقع الشعر