ألتقيك السبت وأشتاق الأحد - شافي القريشي

ياقصيدة شعر يانبض الوجود
ياعساني ما أنحرم منك أبد
أنت حبك يالغلا ماله حدود
وحدك اللى بالحشا قام وقعد
وكان ماصدقت عندي لك شهود
عيني وفكري وخفاقي بعد
يحفظك ربي من عيون الحسود
ياعسى عيونه يطاولها الرمد
من غرامك والعنا مالي صدود
لوصبرت أيام ماعندي جلد
كل يوم الشوق في قلبي يزود
(ألتقيك السبت وأشتاق الأحد)
عاشقك عشق الفقارى للنقود
يارصيد اللي ملاينه رصد
كل ماهبت على ذكراك نود
أذكر التوت المحلا والشهد
وأذكر العطر الرومنسي والورود
وأذكر أحلى ذكرياتك والوعد
والله اني مابعد بحت السدود
لين ماعشت بفراقك في كبد
أنت للقلب المحرك والوقود
ماكذبت إن قلت مجتاح الجسد
ماوعدت إلا وأنا قد الوعود
أجهر بصوتي ولاعندي ف أحد
ماملكني غير حبك في الوجود
((وغيرك من الغيد تكمالة عدد))
© 2024 - موقع الشعر