سجة وسجة

هجوس الشعر سبّب لي برجّه
بعد مادار بي سجّه وسجّه

يمين يسار من ديره لديره
وانا محتار به من وين أوجّه

آلا هات الشعر يا فكر راسي
قبل لا اشوف في راسي مشجّه

سريت بهاجس الشعر متصافي
وجو القاف ثاير فيه عجّه

ليا منّه غفى في طرف ساعه
يزاعج خاطري قمري يصجّه

وانا بنت العبيه وش علينا ؟
مدام الغيث في داري مدجّه

يجي برضاه وإلا غصب ياتي
وباب القاف عندي غصب أفجّه

أنا البحّار يا در المثايل
لو ان البحر حندس فيه لجّه

وانا شيهانة طويق العريبه
حذار تحدّ بعناد وتزجّه

عنيدة راس ابويه قالها لي
عنيد الراس من يقدر يحجّه .!؟

لكان انّه سرابه برق ناضي
يسبب له لجيج الشعر رجّه

مثل رجّة هجوس الشعر فيني
بعد مادار بي سجّه وسجّه