الثعل والذيب

سود الليالي والظروف الشقيه
مثل المسّن اللي يحد الشباري

احد(ن) وقف فيها عزومه قويه
واحد(ن) زبن عنها مخارج طواري

ترى الثعل والذيب ماهم سويه
لو كان عاشوا كلهم بالصحاري

الذيب مايشكي ونفسه غنيه
لو طّق من جوعه محد فيه داري

وضح النقاء يمشي على طهر نيه
في خوته ماهو ب بايع وشاري

ولا الثعل لو شفت نفسه دنيه
على طفاس القوم دايم يباري

يغدر ويجزي حسنة الشي سيه
متقلب النيات ليل ونهاري

والادمي مابين هذي وذيه
ياخذ يمين الدرب ولا يساري

وضّحتها ل اهل العقول الذكيه
وكل(ن) على ماقيل عارف وداري

موقف مضى لكن مأثر عليه
وأثر على شخصي وحتى قراري

من سّبته لا حان وقت العشيه
بين الهضاب السود ضايق وساري

اسج وعيوني تناهش نديه
والدمع ناقع مثل نقع الخباري

دمع الرجل ماهو بدمع الصبيه
وش جاب ثلج وماء لجّمره وناري

اصدق نجوم اللي بحز المسيه
واكذب نجوم اللي بحز الظهاري