دق هاجوس

كل ما حلت الفرصه وحان المجال
دق هاجوس شعري في هجوس الضمير

صار في داخلي بين الضلوع اشتعال
كن في خافقي طير (ن) يريد المطير

قلت يالله عليك النصر والاتكال
صار بين القلم والبوك وضع(ن) خطير

القريحه تزاحم بالبيوت الجزال
والمشاعر تفيض بجم بحر (ن) غزير

كان لاحتجت شعري مايشد الرحال
اترك الشعر كله واعتذر واستخير

شاعر(ن) مايجمل مثل ذا الاحتفال
يترك الصف الأول يتجه للأخير

اما انا ضامنن شعري من الاختلال
فالمواقف كما السيف الرهيف الشطير

ان بغيته مبارز وان بغيته سجال
مايوردني الجمه بحبل (ن) قصير

المواجيب والرفقه وقدر الخوال
دونها مايجوز العذر مهما يصير

جيت اهني وارحب في كرام السبال
وكل رجال في ماجوب ربعه خشير

مرحبا عد مايمطر صدوق الخيال
لين سيله مع الوادي يقب الهدير

مرحبا بالرجال مكملين الرجال
الشيوخ الاكابر والملم الغفير

مرحبا فالوادع و مرحبا فالقبال
سلمنا والرجال بسلمها تستنير

ليلة (ن) جمعتكم من خيار الليال
في ضيافة ذوي محسن ذرى المستجير

لابتن كاسبين الطيب في كل حال
يكسرون السليم ويجبرون الكسير

طيبهم واسمهم شامخ سوات الجبال
اقرب الناس يحسدهم عليه ويغير

بالمراجل يعمرون الحصون الطوال
والمعارف توردهم على كل بير

الصطر والشجاعه عندهم راس مال
والكرم والزعامه في دماهم تسير

من سلايل عتيبه كاملين الخصال
محتمين الد خيل ومنقذ ين الاسير

قوة (ن) ماتقاوى في نهار القتال
فزعة (ن) من كرمهم يستعيش الفقير

للقرابه كما الشرب القراح الزلال
وللمعادي وللحساد مر(ن) مرير

من زبنهم يحطونه بداف الظلال
ومن نصاهم يحيونه بوجه (ن) سفير

بأزرق العود مع كيفَ بصفر الدلال
والنبا اللي بوجه الضيف ماله نظير

في وجوب المسيّر يرخصون الريال
مايسالون عن سعر الطلي والبعير

لو أعدد مزاياهم تفوق الخيال
شي منها ذكرت وفيه باقي كثير

مثل كل القبايل والحقيقه تقال
واحد (ن) مايقول الحق مافيه خير

النشاما جنوب وغرب شرق وشمال
كل دار(ن) بهلها والسواير تسير

مقدر احكم عليهم بالوفا والكمال
حكمهم في يد الرب السميع البصير

خايف ان الاجابه ماتحل السؤال
لو نشدني من العرّاف رجل (ن) خبير

وفي ضميري علومن باقية ماتزال
ارفع التهنئة لاهل المقام الكبير

تهنئة للشيوخ وتهنئه للعيال
واتمنى لهم من كل خير (ن) وفير

ياجزيل العطايا ياعزيز الجلال
يامهون بحكمه كل شي (ن) عسير

دلنا للهدى والحق والاعتدال
وأنجنا يا إلهي من عذاب السعير

واختتم كلمتي باحسن كلام يقال
ثم صلوا على الهادي البشير النذير