البـــر

قالوا نشوفك تحب البر قلت البر محبوب
عاشق ولا ضنتي تلقون للعاشق مداوي

قالوا تعب قلت راحة والتعب فالبر مرغوب
هذا هوايه وقلي للتعب فالبر هاوي

قالوا خلا قلت مشي فالخلا ما فيه عذروب
إن كان مشي الخلا عذروب سموني خلاوي

يومني أجلس تحت شجرة وضو النار مشبوب
الأرض تسوى فراش الزل والبشت الحساوي

أنام في جو هادي والهدوء للنفس مطلوب
واصحا مع الفجر الأول قبل مسراح النداوي

إليا أذن الفجر أصلي وأتحزم واشمر الثوب
أحيان فالظهر أجي وأحيان أجي فالليل ضاوي

أمشي على راحتي ماني على المرجاع مغصوب
مع راس مزموم ولا مع قرا حزم امتساوي

أسلي النفس فالدنيا ويوم والأجل مكتوب
قدام لا ياصل المرسول قطاع العراوي

جربت الأيام فيها يوم حلو ويوم منكوب
وجربت الأصحاب فيهم مستدل وفيه غاوي

ويا ما تكدر عليه في زماني كل مشروب
ويا ما صفا لي من الدنيا وزادتني هقاوي

ويا كثر ما للبشر غيري علي احقوق ووجوب
ويا كثر ما لي عليهم من حقوق ومن دعاوي

اخذ واعذل علي نفسي وصك دروب بدروب
من خوف لا يفرحون اللي يحبون الهزاوي

النفس تكره كلام اللي يجيب العلم مقلوب
والعين تكره تشوف الرجل فالزلات هاوي

يا الله يا منزل الأيات في يوسف ويعقوب
يا رب عبد يعد الوقت في عطفك رجاوي

يا واسع المغفرة يا فارج الكربه عن أيوب
رحمتك وسع السماء والأرض ما يقولك قاوي

تغفر ذنوبي وتمحى زلتي لن كنت مذنوب
يوم الحساب العسير ويوم توزيع البراوي

في ساعة كل ما فيها من الأعمال محسوب
ما ينفع العذر فيها لا فقير ولا غناوي

أبصارهم خاشعة ما عندهم ريس ومنصوب
وجنود ربي يعزلون السعيد عن الشقاوي

يا رب حنا عبيدك وامرنا بيديك مقضوب
يا منزل الغيث يا محيي به الدار السناوي

حنا محل الخطا وانته محل العفو والتوب
اغفر لنا ما وقعنا فيه من كل البلاوي