المجاراة لقصيدة محمد بن فطيس

الشعر في كف العذاب خضابه
تلعب عليه رياحه اللعابه

أودى بقلبي واستبد بروحي
واشرفت من عهد الصبا مرقابه

من يوم عيني وقِّفت بطلوله
ما عاد قلبي يستريح إلا به

ياما عليه من النصب يُنصب لي
وانا لجيشه ظفرةٍ حرَّابه

كم شاعرٍ دوني ينوّْخ قافه
واسلب حلاله وانثني لركابه

ميراث جدي واحتمى بعروقي
واوفيت له لو ما قريت كتابه

ياربعي اللي تنطحون القاله
الذيب من عقبه يجون ذيابه

جدي حسين إن كان ما تطرونه
يشِّر عليه الجود بالسبابه

لو مرته ريح الكرم في قبره
حيا بها لو ما يقوم ترابه

وانا عليّْ الوسم وسم فعوله
ولا نيب له لو ما حميت شعابه