الكحيله

لـ عيده الجهني، ، في غير مُحدد

الكحيله - عيده الجهني

عديت لي رجم على راس نايف
باقي رسومه للبلى مستهيله

مبناه شرق اللي على الخيف لايف
وايمن مسير اللي يجي للنفيله

وقفت به وانا وقوفي كلايف
وارخيت له عن عبرة العين شيلة

له جابني من ماضي الحب طايف
يوم الهوى صادف نفوس بخيلة

ماني على المقفي كثيرة حسايف
ولا نيب للبرق المجنب مخيله

مادام ماوبله بقاعي ذرايف
وش لي بحروة بارقه كل ليله

انا وفيت وشفت ماكنت شايف
والحب عفته يوم هذي حصيله

لا ابديتها من هرجة الناس خايف
واليا سكت بوسط كبدي مليله

لي صاحب لا قبل ولا هوب عايف
متحير بين الطمان وطويله

على ذلوله موميات السفايف
تبدي لقلبي مابدا من رحيله

ضحكت له وابديت زاه الشفايف
وارويت من نبع الموده صميله

ان رحت ياكثر الركاب النكايف
ماكل خيال يحوش الكحيله

© 2024 - موقع الشعر