شرفك بوشاح البطل ياحفيده - طراد سميحان السويدي

ياحي صورة شفتها بالجريده
صورة محمد مع حبيب الملايين

هذاك أبو نايف فعوله مجيده
وهذاك أبو متعب زعيم السلاطين

وقفه وفا بين الشهيم وعضيده
وماهي غريبه من طليق الحجاجين

شرفك بوشاح البطل ياحفيده
وسام من وحد بلاده على الدين

تستاهله ياللي قهرت الشديده
بوجه العدو يا ما قلبت الموازين

تبطل مكيده وتصدى لمكيده
والفعل شاهد يازعيم الميادين

خذيت من نايف مزايا فريده
وأخوك روح الأمن سقم المعادين

فيك الشجاعه والصفات الحميده
وموقفك شامخ مايبي له براهين

حماك ربي يوم جالك شريده
من شرذمه عن كلمة الحق غادين

متظاهر ٍ بالدين وأهل العقيده
ثم أنتحر قدم العباد المصلين

من زمرة أبليس الرجيم وعبيده
جزاك يامروع هل الدين بعدين

والمملكة مدحور منهو يكيده
نقولها في سابق الوقت والحين

الشعب وافي والحكومة رشيده
وشعارنا معروف نخله وسيفين

© 2022 - موقع الشعر