سمع ظامي

ودي اكتب ..كم يرددها..ولا شفنا كتابه
كم يقل ودي أقول ..ولا يقول اللي يبيه

كم يقول وكم يقول .. وكل مافيني تشابه
سمع ظامي سلسبيل ..وعين خرسى تحتريه

صرت كني صخر في وادي ويتحرى مجابه
سيل عارم ..بس عيا السيل ذاك انّه يجيه

هيه يا سيل الحروف اللي تدور عن اجابه
فج صدر الصمت وارسم من قصاصاتك وجيه

أتعبتني تمتمات الحرف .. واتعبني عذابه
بين احاسيس ٍ تبي تعلنه لكن تستحيه

أدري انك قادر ٍ تغرف من المعنى سرابه
وادري ان الحرف خيل ولا يضيرك تمتطيه

وادري انك فيك للكلمة ظما وانّي شرابه
والحروف ادري بتسكبني اذا قلت اسكبيه

وادري انك مثل براق ٍ يخايل في سحابه
وانت تدري بان جدب الارض فيني يرتجيه

هيه ..انا باقي هنيا وانتظر حضرة جنابه
وابل ٍ يسقي جفاف الفكر حتى يرتويه

أومن اقصى ليل فكرك لوبغيت ارسل شهابه
يا رجم شيطان فكري .. ياحتواني واحتويه